Mesa redonda:
Metodoloxía e xestión dos arquivos da música de tradición oral
Xornadas XIX: Traducir a tradición

O pasado venres 21 de marzo, Rubén Troitiño participou nas XIX Xornadas Traducir a tradición, celebradas en Santiago de Compostela, en representación do seu proxecto Músicas da Terra de Montes. A súa intervención tivo lugar na mesa redonda Metodoloxía e xestión dos arquivos da música de tradición oral, moderada por Marián Fernández, investigadora e especialista en arquivos sonoros.

Nesta mesa, compartiu espazo con outros profesionais do ámbito da etnomusicoloxía e da arquivística:

• Concha Losada, responsable do Arquivo do Patrimonio Oral da Identidade (APOI), unha das principais iniciativas de documentación e conservación do patrimonio oral galego.

• Quique Peón, mestre, compilador e investigador da música e do baile tradicional, cunha extensa traxectoria no traballo de campo e na recuperación de repertorios.

• Francesc Viladiu, co-director do proxecto Càntut. Cançons de tradició oral, unha iniciativa dedicada á recollida, preservación e difusión da música oral en Cataluña.

As XIX Xornadas Traducir a tradición, organizadas pola Deputación da Coruña e comisariadas por Aitana Cuétara, investigadora e produtora cultural vinculada ao proxecto O que non se escribe, tiveron lugar do 19 ao 21 de marzo na sede da Fundación SGAE no Parque de Vista Alegre, en Santiago de Compostela.

Baixo o lema “a necesidade de definir un protocolo ou manual de boas prácticas legal, ético e de xestión para o tratamento dos arquivos e das persoas implicadas neles”, o evento reuniu investigadores, músicos, avogados e xestores culturais para debater sobre o tratamento do patrimonio oral e a súa relación coa creación musical contemporánea.

A programación incluíu diversas mesas redondas e conversas con especialistas como:

• Antía Vázquez e Pedro García, que participaron na apertura das xornadas.

• Ania González (avogada) e Xulia Feixóo (etnomusicóloga), que presentaron unha proposta de manual de boas prácticas no tratamento da música de tradición oral.

• Jaume Ayats, profesor de etnomusicoloxía na Universidade Autónoma de Barcelona.

• Ramom Pinheiro, editor en aCentral Folque.

• Adrián Méndez, músico en De Ninghures.

• Raúl Rodríguez, músico e antropólogo, e Rafael Quintía, antropólogo, que reflexionaron sobre a chegada da música tradicional ao mainstream e a súa xestión emocional.

• Guillerme Ignacio, músico e investigador en Arredor da Tradición, quen xunto con Xulia Feixóo abordou as boas prácticas no traballo de campo.

• Xabier Díaz, músico e compilador, que presentou o Cancioneiro galego serodio (1989-2012).

O programa completouse con actividades complementarias, como visitas guiadas ao Arquivo Sonoro de Galicia (ASG) do Consello da Cultura Galega e ao Arquivo do Patrimonio Oral da Identidade (APOI) do Museo do Pobo Galego.

As xornadas destacaron pola súa vocación interdisciplinar, abordando cuestións como os dereitos de propiedade intelectual, a ética no traballo de campo, a xestión emocional da chegada da música tradicional ao mainstream e os modelos de preservación e difusión do patrimonio oral.

Fotografías: Luneda Producións