Novas

O proxecto Músicas da Terra de Montes foi nomeado aos Premios Rebulir da Cultura Galega 2026, na categoría Homenaxe, un recoñecemento que supón un importante impulso para un traballo que, desde os seus inicios, ten como obxectivo documentar, conservar e divulgar o patrimonio musical e etnográfico da comarca da Terra de Montes.

Esta nomeación constitúe, por riba de todo, un recoñecemento colectivo. Ao longo dos anos, centos de persoas contribuíron a facer posible este proxecto compartindo lembranzas, repertorios, fotografías, gravacións, documentos e vivencias que forman parte da memoria musical da comarca. Sen a súa confianza, xenerosidade e colaboración, Músicas da Terra de Montes non existiría.

Desde a súa creación, o proxecto converteuse nun espazo de investigación, documentación e difusión da música tradicional da Terra de Montes, co propósito de preservar este valioso patrimonio e facelo accesible ás xeracións presentes e futuras.

Queremos expresar o noso agradecemento a todas as persoas que, dun ou doutro xeito, forman parte deste camiño. Este nomeamento anímanos a seguir traballando coa mesma ilusión, compromiso e responsabilidade na conservación e posta en valor da nosa cultura tradicional.

Así mesmo, felicitamos ao resto de persoas, colectivos e iniciativas nomeadas nesta edición dos Premios Rebulir da Cultura Galega, polo seu labor a prol da cultura galega.

A gala de entrega dos premios celebrarase o vindeiro 19 de decembro de 2026, no marco do Festival Internacional Rebulir.

Moitas grazas a todas as persoas que facedes posible Músicas da Terra de Montes. Seguimos traballando para que a memoria musical da nosa comarca continúe viva.