Novas

A fin de semana do 24 e 25 de xaneiro de 2026 foi especialmente significativa para o proxecto Músicas da Terra de Montes, ao combinar traballo de campo, recollida de memoria oral e incorporación de novo patrimonio instrumental, elementos fundamentais tanto desde unha perspectiva divulgativa como académica.

Grazas á xenerosidade da familia Alberte Fírvida, e de maneira especial a Marta, o proxecto incorpora dúas congas utilizadas no Changüí, que pasan a formar parte da colección privada vinculada á investigación. Estes instrumentos constitúen un valioso testemuño material dunha práctica musical concreta, ampliando o corpus de fontes para o estudo organolóxico e etnomusicolóxico. Aínda que unha das congas se atopa nun estado de conservación moi deficiente debido á acción das polillas, manterase igualmente na colección polo seu valor documental e histórico.

No marco desta fin de semana de traballo realizouse tamén unha visita á parroquia de Pedre, que permitiu afondar en diversos aspectos do seu patrimonio musical e sonoro. Entre eles destaca o Himno a San Esteban, interpretado tradicionalmente nas festas parroquiais, así como o uso das carracas durante a Semana Santa, prácticas que forman parte da identidade ritual e sonora da comunidade.

Durante esta visita puido igualmente documentarse e fotografarse un harmonio doado ao pobo de Pedre, instrumento de notable interese histórico e musical, que achega información relevante sobre o uso e presenza deste tipo de instrumentos no ámbito parroquial. O proxecto quere expresar un agradecemento especial a Sonia Barros pola súa dedicación, colaboración e por facilitar o acceso á igrexa, facendo posible este labor de documentación.

Toda a información recompilada, xunto co material fotográfico realizado ao longo da fin de semana, será incorporada proximamente ao arquivo virtual da web de Músicas da Terra de Montes, contribuíndo así á actualización continua do proxecto e á difusión rigorosa do patrimonio musical da comarca.