Novas

As músicas da Terra de Montes seguen medrando. Xa está dispoñible na nosa web o audio do Himno a San Esteban, unha peza de gran valor para a memoria musical da parroquia de Pedre, recuperada dunha cinta de casete gravada a comezos da década de 1990.

A gravación foi dixitalizada por Rubén Troitiño a partir dunha cinta compartida por Sonia Barros, permitindo así conservar e difundir unha melodía que formou parte da vida relixiosa e comunitaria durante xeracións.

O Himno a San Esteban interpretábase tradicionalmente no lugar de Pedre durante a novena e no día grande das festas, celebradas dúas veces ao ano: o 3 de agosto, na festividade de verán, e o 26 de decembro, na de inverno. A peza cantábase ao longo de todos os días da novena, coincidindo o último co día principal da celebración, e tamén se interpretaba no tempo entre a novena e a misa solemne.

Segundo relata Sonia Barros, foi Gonzalo Barreiro Gandos, daquela sancristán da igrexa de Pedre, quen promoveu a iniciativa de conservar o himno ante o risco de que se perdese co paso do tempo. Grazas a esa decisión, hoxe podemos volver escoitar esta melodía.

Para a súa conservación realizouse, arredor do ano 1990, unha gravación na que participaron varias veciñas de Pedre cantando o himno. Esta é precisamente a cinta que serviu de base para a dixitalización agora publicada.

A autoría da partitura segue sendo descoñecida. Segundo a memoria oral, podería tratarse dun home que percorría a zona cun teclado e que tamén participaba nas celebracións relixiosas, mais non se conservan datos precisos sobre a súa identidade.

Con esta nova incorporación, continúa o labor de recuperación, preservación e difusión do patrimonio musical da Terra de Montes, achegando ao presente sons que forman parte da nosa historia colectiva.