Músicas da Terra de Montes é un proxecto creado polo músico Rubén Troitiño adicado á conservación, estudo e difusión das músicas da comarca da Terra de Montes. 

A historia do proxecto

A historia de Músicas da Terra de Montes comeza en 2005, cando Rubén Troitiño iniciou a recollida dos nomes dos músicos que, nos anos pasados, tocaban a gaita na comarca. A idea inicial era crear unha lista que se publicara no portal web da Asociación Cultural Os Abrentes de Cerdedo. Con todo, a medida que o tempo pasaba, a información recollida foi aumentando e a lista expandíndose cada vez máis. Durante uns anos, este proxecto quedou un pouco en pausa, pero foi en 2015 cando se retomou con novo impulso.

O confinamento do 2020 proporcionou o tempo necesario para que o que comezara como unha pequena lista de gaiteiros se convirtese nunha investigación máis profunda sobre a vida e a historia das músicas da Terra de Montes. A memoria colectiva, en moitos casos, tiña case esquecida a presenza de moitos músicos do antigo concello de Cerdedo e Forcarei, entre eles gaiteiros, pandeireteiras, bandas de música e outros artesáns. Este proceso de recuperación e recompilación de datos históricos e biográficos tamén inclúe a conservación de material físico, como instrumentos e fotografías, que achegan unha dimensión máis directa e tangíbel á realidade destes músicos.

Un dos obxectivos principais deste proxecto é deixar constancia da gran cantidade de gaiteiros, acordeonistas, pandeireteiras, percusionistas e músicos de banda que houbo nesta comarca. A través da memoria dos nosos maiores, conseguimos recuperar unha parte fundamental da nosa historia, unha tradición que se transmitiu de xeración en xeración, manténdose viva durante anos e persistindo até os nosos días. A colaboración de persoas e entidades que axudaron na investigación e na creación de contidos foi fundamental, e dende aquí queremos expresar o noso agradecemento a todas aquelas persoas que, de maneira desinteresada, enriqueceron este proxecto.

O proxecto

Músicas da Terra de Montes nace co propósito de preservar e dar valor ás expresións culturais transmitidas oralmente durante xeracións. Este patrimonio, que se perde pouco a pouco co paso do tempo, merece ser gardado e respectado. Queremos recoller testemuños, repertorios e biografías das persoas que viviron para a música e construír así un arquivo vivo que sirva de referencia para o futuro. Traballamos con coidado e dedicación para que cada historia e cada melodía queden rexistradas e sigan sendo fonte de inspiración.

Dentro deste marco, o arquivo virtual das músicas da Terra de Montes presenta un percorrido pola historia musical desta zona, incluíndo as pandeireteiras, gaiteiros, bandas de música e pequenas orquestras que animaban as festas e romerías, mantendo a música viva durante moitos anos. A maioría destes músicos non foron figuras de renome nacional, pero foron profundamente populares nas súas comunidades, deixando un gran legado cultural que agora podemos estudar e preservar. Actualmente, o arquivo conta con máis de 325 artigos e segue en constante renovación coas últimas investigacións e novidades. 

Colabora co proxecto

Músicas da Terra de Montes está aberto á participación de toda a comunidade. Se tes fotografías, gravacións ou algún outro tipo de material relacionado co patrimonio musical da comarca, invitámoste a compartirllo. A túa colaboración axudará a manter viva esta rica tradición e a asegurar que non se perda no tempo.