Manolo Muradás Muradás
O echacuentas

Segundo comenta Manolo nunha das súas entrevistas, antes do grupo Los Montes, estaba o grupo Changüí, no que tocaban os irmáns Avelino Alberte Fírvida (acordeón) e Bautista Alberte (batería). Posteriormente, Bautista ausentaríase e entraría no seu lugar Pepe Alberte, tamén coñecido como Pepe Orellas. Máis adiante, tamén entraría na formación Juan Julio López Barreiro, coñecido como Nito, na voz e posteriormente tamén coa guitarra. A última incorporación sería Manolo coa guitarra. O pouco que sabía foi aprendido de forma autodidacta e con axuda de Avelino, xa que este si sabía música. 

Manolo lembra que comprou a súa guitarra en Carballiño, aínda que non lembra exactamente a quen lle comprou. Con todo, cre que a adquiriu a un dos membros da orquesta Millara. Cando Manolo emigrou a Alemaña, o seu posto en Os Montes foi ocupado por Alfredo Viéitez, tamén coñecido como o Barrecho.

A Sala Changüí foi o escenario onde a banda tocou en varias ocasións. Tocaban os domingos e os mércores de feira, ademais de tocar en bodas e outros eventos onde interpretan cancións variadas e actuais da época, incluíndo cancións dos grupos de Formula 5, Los Bravos e outros temas que eran populares na radio e na época.