Julio Durán Sieiro
Julio Durán Sieiro, nado en Cerdedo o 3 de outubro de 1927, músico de referencia da zona de Cerdedo e da Terra de Montes, pola súa memoria e os seus coñecementos musicais e un dos pilares fundamentais para a elaboración do libro As bandas de música de Cerdedo do autor Manuel Campos Toimil. Fillo de solteira de Luzdivina Durán Sieiro (1903), unha das irmás maiores de Valentín (08.05.1914) e de José, Cheché (22.03.1920).
Músico de solfa, emigrante retornado, viveu toda a súa vida da música. Comezou novo da man do seu avó José María Durán. O seu primeiro instrumento foi o clarinete aínda que posteriormente tamén tocaría o saxofón ou a gaita entre outros instrumentos.
O primeiro mestre que tivo sen ser familiar fora Francisco Cerdeira Gil, onde se estreou coma músico na banda que dirixía con 12 anos. O clarinete fora mercado por 10 pesos ao música Arximiro González. Posteriormente montaría un pequeno grupo cos seus tíos Valentín e Cheché. Así o deixou recollido Campos no libro das bandas de música:
Pero Valentín tamén foi un bo gaiteiro. De feito, xunto co seu irmán Xosé e mailo seu sobriño Xulio impulsaron un grupo de gaitas‐charanga tradicional no que tamén participaron os músicos da Banda de Cerdedo Xosé María Sieiro co bombo, Arturo Sieiro co clarinete e David Paz coa caixa. Antonio Vidal foi outro bombeiro desta agrupación que nunca estivo relacionado coas bandas cerdedenses.
Ramón José Lavandeira Limeres prestáballe o punteiro para que Julio practicase, e así facía cando tiña que ir ao monte a levar as vacas. Nunha das entrevistas realizadas polo ano 2016, Julio comentounos o inicio desta pequena agrupación. As bandas de músicas eran mol populares naquela época e o que facía falta eran gaiteiros, é por iso que se xuntaron e mercaron as gaitas en Pontevedra, no taller de Poceiro. O grupo que tiveron era unha novidade: dúas gaitas, clarinete, saxofón... Aproveitaron para tocar cos instrumentos de banda e de vez en cando incorporaban as gaitas para que fora algo diferente, tamén dependía do ritmo e do tipo de pezas que interpretaban.
En Venezuela seguiu exercendo de músico ademáis de rematar os estudos de oboe e frauta no conservatorio de Caracas.
A continuación, poderedes ver algúns dos métodos que aínda se conservan. Os métodos de frauta, clarinete e oboe foron publicados baixo o selo de Ricordi. No de frauta aínda se pode ler onde foi mercador: El palacio de la música - Caracas, Venezuela.
Formou parte da Banda Marcial de Caracas durante 15 anos ademáis de tocar nun cabaret acompañando co saxofón os shows. Ademáis pasos tempadas no Brasil (San Paulo, Río de Janeiro e Santos). Pero a súa aventura musical non remata aqui:
Foi así que tocou en varias ocasións no circo dos irmáns Aragón, e con eles ata fixo algunha actuación televisada. Mesmo se lembra de ver a un pequeno Emilio Aragón aprendendo a andar por entre os artistas.
Outras das orquestras nas que participou foron a Orquesta Villar y sus Tropicales (na década do 1960), a Orquesta Atlántico, a Orquesta Copacabana e a Orquesta Casablanca. E como xa fixeran en Cerdedo, Xulio e mailos seus tíos formaron unha agrupación de gaitas que actuaba en moitas das festas e romarías que organiza‐ ban os galegos que por aquelas terras de ultramar residían.
Unha vez regresado a Galicia tocou 15 anos coa Banda de Música de Vilatuxe e colaborou con moitas máis: Agolada, Monterroso, Merza, Ponteledesma, Muimenta, etc.
Nos últimos anos acompañou co órgano ao Coro Parroquial de Cerdedo.
Julio faleceu o mércores 5 de xullo de 2023.
Na fotografía podemos observa a gaita da Julio Durán que aínda se conserva, doada polo mesmo músico a Rubén Troitiño. O fol que é de goma negra e foi un regalo dun dos irmáns Cachafeiro igual que o soprete. Afinación en Si bemol aproximadamente, do artesán Poceiro de Pontevedra.
Nesta fotografía podemos ver a José Fírvida Cachafeiro, Maduro xunto a Julio Durán, José Barreiro ao tambor e José Durán, Cheché.
“Monso” Lavandeira e Julio Durán, integrantes da banda La Unión, posando cos instrumentos cambiados en Doade (Beariz)
Julio Durán Sieiro e Nicolás García Fortes.
Eduardo Troitiño Varela, Jaime Barros Gondariz, Julio Durán Sieiro, Ramón Ricoy Mosquera e Nicolás García Fortes.
Julio Durán e o coro parroquial de Cerdedo.
Prensa
Falece o músico Julio Durán, memoria viva da riqueza cultural de Terra de Montes
Formou parte e apoio a diversas bandas e falecía este mércores aos 95 anos de idade
06 jul 2023
Desde moi temperá idade a música cativou a Julio Durán Sieiro, memoria viva da riqueza cultural non só da súa Cerdedo natal senón de toda Terra de Montes e doutros moitos recunchos onde achegou o seu granito de area en agrupacións musicais e bandas. Este mércores falecía aos 95 anos de idade despois dunha intensa vida e un legado que perdurará cando resoe as notas na súa terra. «Atopámonos mergullados nunha profunda tristura ao saber do facelemento dun ser querido, o músico Julio Durán. Foi un mestre apaixonado e xeneroso que compartiu coñecementos musicais comigo dunha forma inigualable», comentaba con pesar Rubén Troitiño, impulsor da recuperación da música tradicional en Terra de Montes. Destacaba o baleiro que deixa en a comunidade musical para remarcar que a súa dedicación e paixón polas tradicións continuará viva.
Julio Durán nacía o 3 de outubro de 1927 en Cerdedo, mostrando desde pequeno un interese pola música que lle levou a explorar e dominar diversos instrumentos. Tocaba o clarinete, o saxofón e a gaita, adquirindo uns profundos coñecementos e contando cunha memoria prodixiosa que lle convertía en testemuño vivo do patrimonio cultural de Terra de Montes. A súa contribución transcendeu os límites locais ao converterse nun alicerce fundamental para publicacións ao redor da música en Cerdedo, como o libro de Manuel Campos Toimil sobre as bandas, así como no proxecto de Rubén Troitiño ao redor das músicas destas terras. A carreira de Durán Sieiro abarcou continentes, xa que viviu a emigración, residindo durante anos en Venezuela. No país caribeño non só exerceu como músico senón que perfeccionou as súas habilidades estudando oboe e frauta no Conservatorio de Caracas. Tocou en prestixiosas orquestras, entre elas a Banda Marcial de Caracas, acompañando ademais coa súa saxofón a artistas en espectáculos de cabaré.
A morriña e o anhelo de regresar a Galicia levoulle a pechar a súa aventura musical no estranxeiro. Ao regreso a terras galegas dedicou o seu talento e a súa paixón a colaborar coas diferentes bandas de música, entre elas a lalinense de Vilatuxe, coa que traballou durante quince anos. Tamén brindou o seu apoio a outras formacións en Agolada, Monterroso, Merza, Ponteledesma ou Muimenta, entre outras localidades. Nos últimos anos Julio Durán continuou compartindo ese apego coa música ao acompañar ao Coro Parroquial de Cerdedo tocando o órgano. O seu legado musical farase eterno e a súa partida deixa un baleiro entre quen viviron con el ese sentimento, entre quen traballaron e accederon á súa sabedoría. Quen lle coñecen destacaban a súa xenerosidade tamén como mestre e a súa amabilidade, sempre disposto a dar un consello. Este xoves terá lugar o funeral e enterro ás 17.,00 horas na igrexa parroquial de Cerdedo. E Rubén Troitiño lanzaba unha mensaxe na súa memoria: «Convido a todos aqueles que foron tocados pola súa música a compartir xuntos a lembranza deste ser extraordinario. A túa música vivirá para sempre nos nos corazóns».
