Constantino Paz Gil

Fillo do músico Manuel Paz e de Josefa Gil, Constantino Paz Gil naceu en Cerdedo o 12 de outubro de 1.858. Comezou na música no mundo tradicional da man do seu pai, do que aprendeu a tocar a gaita e o tamboril, e solfexo e música de banda co mestre Campio García. Tiña aptitudes excepcionais tanto en solfexo como na interpretación dos instrumentos, sendo os seus favoritos o requinto e o bombardino.

Entre 1.895 e 1.905 comezou a dirixir a banda de Cerdedo, que ata entón estivera baixo a batuta de Campio García, durante unha morea de anos. É o director máis antiguo da banda de Cerdedo do que se ten constancia por testemuñas directas.

O músico Gervasio Bugallo (Cerdedo, 1.904), dicía que Constantino "sabía dirixir coa man", o que significa que non dirixía soamente con pequenos xestos ou con movementos do instrumento, como se facía habitualmente.

Constantino casou con Peregrina Cachafeiro, con quen tivo once fillos; dous deles chegaron saír a tocar coas bandas, José e David.

Constantino faleceu o 20 de xullo de 1.941, case vinte anos despois de retirarse da dirección da banda.

Constantino Paz cos seus fillos Carmen e David (de pé), a sua nora María Iglesias e a súa neta Ermitas Paz (sentadas)

Artigos relacionados